सिंधुदुर्गात रिक्षा प्रवाशांसाठी 'येतंव' ॲप!

सिंधुदुर्ग

    सिंधुदुर्ग जिल्ह्यात आता रिक्षा प्रवाशांना महानगरातील 'ओला', 'उबेर' प्रमाणेच प्रवासासाठी घरबसल्या रिक्षा बुकिंग करता येणार आहे. सिंधुदुर्ग जिल्हा व्यापारी महासंघाच्या पुढाकाराने 'येतंव' हे प्रवासी रिक्षा ॲप विकसित करण्यात आले आहे. 'येतंव' ॲप रिक्षा चालक व प्रवाशांसाठी मोफत आहेत. पालकमंत्री नितेश राणे यांच्या हस्ते कणकवली येथे या ॲपचे लोकार्पण करण्यात आले.सिंधुदुर्ग जिल्हा आता बदलत असून नागरिकांनी नव्याने निर्माण होणाऱ्या सोयी-सुविधांचा लाभ घेतला पाहिजे. नागरिकांचे प्रश्न व समस्या सोडविण्यासाठी जिल्हा प्रशासन व लोकप्रतिनिधी तंत्रज्ञान आणि एआयचा वापर करीत आहे. विकासासाठी जनतेने सहकार्य करावे, असे आवाहन पालकमंत्री राणे यांनी यावेळी केले.सिंधुदुर्ग व्यापारी महासंघाच्या पुढाकाराने व कणकवली तालुका व्यापारी संघाच्या समन्वयाने सोल्युशन प्रा.लि. यांच्या सहकार्याने हे ॲप विकसित केले आहे. कणकवली महाविद्यालयाच्या एचपीसीएल सभागृहात पालकमंत्री नीतेश राणे यांच्या हस्ते या ॲपचे लोकार्पण झाले.यावेळी सिंधुदुर्ग जिल्हा व्यापारी महासंघाचे अध्यक्ष प्रसाद पारकर, माजी जिल्हाध्यक्ष विजय वळंजू, तालुका व्यापारी संघाचे अध्यक्ष दीपक बेलवलकर, रिक्षा संघटना कोकण विभागाचे अध्यक्ष संतोष नाईक, जिल्हाध्यक्ष नागेश ओरोसकर, कणकवली महाविद्यालयाचे प्राचार्य युवराज महालिंगे, झेंपॲप सोल्यूशन प्रा.लि. कंपनीचे सुबोध मेस्त्री, आनंद वामनसे आदी उपस्थित होते. ना. राणे म्हणाले, जगातील बहुतांशी देश तंत्रज्ञान आणि एआयचा वापर करत आहेत. भारतही यात आघाडीवर आहे. आपला जिल्हा या प्रक्रियेत मागे राहता कामा नये, यासाठी जिल्हा प्रशासनाने तंत्रज्ञान आणि एआयचा वापर सुरू केला असल्याचे ते म्हणाले.प्रसाद पारकर, नागेश ओरोसकर म्हणाले, हे ॲप रिक्षा व्यावसायिक व ग्राहकांना लाभदायक ठरेल. झेंपॲपचे सुबोध मेस्त्री, आनंद वामनसे यांनी प्रझेंटेशनद्वारे या ॲपचा रिक्षा चालक व प्रवाशांनी कसा वापर करावा, याची माहिती दिली. नितीन वाळके यांनी प्रास्ताविक केले.यावेळी कणकवलीच्या माजी नगराध्यक्ष मेघा गांगण, उपनगराध्यक्ष गणेश हर्णे, अशोक करंबेळकर, राजा राजाध्यक्ष, राजन पारकर, सुशील पारकर, नंदू उबाळे, प्रशांत बुचडे, विलास कोरगावकर, नंदन वेंगुर्लेकर, प्रा. हरिभाऊ भिसे, उद्योजक विशाल कामत, भाजपचे तालुकाध्यक्ष मिलिंद मेस्त्री, शहराध्यक्ष अण्णा कोदे यांच्यासह व्यापारी व रिक्षा मालक, चालक उपस्थित होते. रिक्षाचालकांनी या ॲपवर प्रथम लोकेशन टाकावे. यामुळे प्रवाशांना सर्च केल्यावर त्यांचे नाव व मोबाईल नंबर दिसणार आहेत. या ॲपद्वारे प्रवाशी रिक्षा कोठेही बोलवू शकतात. रेल्वे स्थानकावर थेट रिक्षाचालकांशी संपर्क साधता येणार आहे.गेल्या सव्वा महिन्यात 5300 जणांनी हे ॲप डाऊनलोड केले असून 220 रिक्षाचालकांनी नोंदणी केली आहे. पैकी रिक्षाचालकांना या ॲपवर 1914 कॉल आले आहेत.

'येतव' ॲप चा वापर कसा करावा ?

        प्रवाशांनी हे ॲप डाऊनलोड केल्यानंतर या ॲपच्या माध्यमातून त्यांना जवळच्या दोन कि.मी.परिसरातील रिक्षा किंवा चारचाकी गाडी हवी असल्यास त्याची उपलब्धता व संपर्क क्रमांक मिळू शकेल. यामध्ये भाडे ठरवण्याची पद्धत पूर्वीप्रमाणेच असून प्रवासी व रिक्षाचालक परस्पर संवादाद्वारे किंवा व्हॉटस् ॲप मॅसेजवरून भाडे निश्चित करू शकतात. त्यात ॲप कोणताही हस्तक्षेप करणार नाही. स्मार्ट फोन नसलेल्या रिक्षाचालक कोणत्याही फोनवरून महासंघाने दिलेल्या 9082408882 क्रमांकावर व्हॉटस् ॲपद्वारे नोंदणी करू शकतात.