भाऊबीजची ओवाळणी करून परतत असताना युवकाचा अपघातात दुर्दैवी मृत्यू
konkansamwad
Oct 27, 2025 01:03
537
0
सावंतवाडी
गोव्यात बहिणीकडे भाऊबीजेची ओवाळणी करून परतत असताना विलवडे येथील युवकाचा दुचाकी अपघातात दुर्दैवी मृत्यू झाल्याची हृदयद्रावक घटना घडली. ऋषिकेश बापूजी दळवी (वय २०, रा. विलवडे-फौजदारवाडी) असे त्या युवकाचे नाव आहे. हा अपघात रविवारी सायंकाळी उशिरा बांदा हसापूर मार्गावर चांदेल (गोवा) येथे घडला. या घटनेने विलवडे गावावर शोककळा पसरली आहे.
याबाबत अधिक माहिती अशी की, ऋषिकेश हा गोव्यातील आपल्या बहिणीकडे रविवारी दुपारी भाऊबीजेला गेला होता. बहिणीने भाऊबीजेची केलेली ओवाळणी ही त्याच्यासाठी शेवटची भाऊबीज ठरली. सायंकाळी उशिरा तो घरी विलवडे येथे परतत असताना मुसळधार पावसात रस्त्याचा अंदाज न आल्याने झाडाला दुचाकी धडकून त्याचा जागीच मृत्यू झाला. ऋषिकेश याने बारावीपर्यंतचे शिक्षण बांदा येथील खेमराज महाविद्यालयात पूर्ण केले होते.
सध्या तो सावंतवाडी येथील भोसले नॉलेज सिटीत इंजिनिअरिंगच्या पहिल्या वर्षात शिक्षण घेत होता. त्याच्या अपघाती मृत्यूने विलवडे गावात शोककळा पसरली आहे. त्याच्या मागे आई-वडील, बहीण असा परिवार आहे.
