जिल्ह्यात सरस्वती पूजन उत्साहात
konkansamwad
Sep 30, 2025 11:00
210
0
सिंधुदुर्ग
जिल्ह्यात आज सरस्वती पूजन मोठ्या भक्तिभावाने व उत्साहात साजरा करण्यात आला. ज्ञानदेवता सरस्वतीमातेच्या पूजनासाठी सकाळपासूनच शाळा, महाविद्यालये, ग्रंथालये तसेच विविध सांस्कृतिक संस्थांमध्ये भाविकांची गर्दी उसळली होती. शैक्षणिक परिसरात विद्यार्थ्यांनी व शिक्षकांनी एकत्र येऊन मंत्रोच्चार, वेदपठण आणि आरती करून देवीचे पूजन केले.मातेची शुभ्रवस्त्रांनी सजविलेली सुंदर प्रतिमा, फुलांच्या हारांनी व सजावटीच्या रोषणाईने नटविलेले मंडप यामुळे सर्वत्र भक्तिमय वातावरण निर्माण झाले होते. पूजा झाल्यानंतर विद्यार्थ्यांनी निबंध स्पर्धा, वाचन स्पर्धा, वक्तृत्व स्पर्धा अशा उपक्रमांत सहभाग घेऊन ज्ञानपूजेचे महत्त्व अधोरेखित केले. काही ठिकाणी भजन, कीर्तन, सांस्कृतिक कार्यक्रमांच्या माध्यमातून समाजाला प्रेरणादायी संदेश देण्यात आले.घराघरांतही सरस्वती पूजन विधीवत पार पाडण्यात आला. महिलांनी गीत, आरत्या गाऊन वातावरणात भक्तिभाव निर्माण केला. युवक मंडळे व सांस्कृतिक संस्था यांनी एकत्र येऊन समाजातील सर्वांना पूजनात सहभागी करून घेतले."विद्येचे माहेरघर" अशी ओळख असलेल्या कोकणात या उत्सवाला विशेष स्थान असून, जिल्हाभर सरस्वती पूजनाचा उत्साह, भक्तिभाव आणि जल्लोष अनुभवायला मिळाला.
