आता मुंबई विद्यापीठाच्या दोन पदव्या एकाच वेळी घेता येणार

सावंतवाडी

    धकाधकीच्या जीवनात व्यस्त असलेल्या विद्यार्थ्यांना पदवीचे शिक्षण घेता यावे यासाठी मुंबई विद्यापीठाच्या माध्यमातून एकाच वेळी दोन पदव्या आणि त्याही बाहेरुन घेण्यासाठी हिरवा कंदील देण्यात आला आहे. या पार्श्वभूमीवर सिंधुदुर्ग जिल्ह्यातील सहा महाविद्यालया समवेत विद्यापीठाने करार केला आहे. येथील श्री पंचम खेमराज महाविद्यालया समवेत पहिला करार झाला. यावेळी आयोजित करण्यात आलेल्या पत्रकार परिषदेत विद्यापीठाच्या अधिकाऱ्यांनी याबाबातची घोषणा केली. यावेळी संचालक डॉ.शिवाजी सरगर, भोसले नॉलेज सिटीचे अध्यक्ष अच्युत भोसले, प्रा. अनिल बनकर, प्रा. दिलीप भारमल, मंदार भानुसे, डॉ. लिलाधर बनसोडे, श्रीपाद वेलिंग आदी उपस्थित होते.यावेळी श्री. सरगर म्हणाले, धकाधकीच्या जीवनात कोणताही विद्यार्थी शिक्षणापासून आणि त्यापुढे पदवी पासून वंचित राहू नये यासाठी मुंबई विद्यापीठाच्या टीमकडून पुढाकार घेण्यात आला आहे. यात बारावी आणि पदवी नंतर हे शिक्षण घेता येणार आहे. एम.कॉम आणि एम.एस.सी यासारख्या तब्बल २८ अभ्यासक्रमांचा समावेश आहे. यावर्षी पासून हे अभ्यासक्रम सुरू होणार आहेत. संबधित विद्यार्थ्याला एकाच वेळी दोन पदव्यासाठी प्रवेश घेता येवू शकतो. यात एका पदवीसाठी ७५ टक्के हजेरी महत्वाची आहे. दुसऱ्या अभ्यासक्रमासाठी हजेरीची अट नाही. संबधित अभ्यासक्रमासाठी प्रवेश घेणारा विद्यार्थी ऑनलाईन पध्दतीने शिक्षण घेवू शकतो. विशेष म्हणजे हे अभ्यासक्रम मुंबई विद्यापीठाच्या माध्यमातून घेण्यात येणार असल्यामुळे त्याचा फायदा संबधित विद्यार्थ्यांना होणार आहे. नियमित अभ्यासक्रम आणि पदवीच्या तोडीचीच ही पदवी आहे. तसेच एखादा विद्यार्थी राज्यात कोणत्याही केद्रांमधून ही पदवी करु शकतो. कोकणात सात जिल्ह्यात ही केंद्र उपलब्ध करुन देण्यात आली आहेत. यात सिंधुदुर्ग, रत्नागिरी, रायगड, ठाणे, पालघर आदी जिल्ह्याचा समावेश आहे, असे त्यांनी सांगितले. यावेळी कोकणात पहिल्यांदा श्री पंचम खेमराज महाविद्यालया समवेत करार करण्याचा मान देण्यात आला. यावेळी युवराज लखमराजे भोसले यांनी तो करार स्वीकारला.