प्रेरणादायी व्यक्तिमत्त्वांना सन्मान देणाऱ्या ‘कोकण कला महोत्सव २०२५’ चे मुंबईत आयोजन

मुंबई

    यशाच्या वाटचालीत भूतकाळातील क्षण विसरू नयेत, कारण त्या अनुभवांतच खरा आनंद आणि प्रेरणा दडलेली असते. अशाच प्रेरणादायी आठवणींना उजाळा देत आणि विविध क्षेत्रात उल्लेखनीय कार्य करणाऱ्या व्यक्तींना गौरवण्यासाठी कोकण कला व शिक्षण विकास संस्था गेली १४ वर्षे ‘कोकण कला महोत्सव’ हा भव्य सोहळा साजरा करते. या वर्षीचा ‘कोकण कला महोत्सव २०२५’ हा सोहळा ३१ ऑक्टोबर २०२५ रोजी, मुंबईतील स्वातंत्र्यवीर सावरकर नाट्यगृह, दादर येथे मोठ्या उत्साहात पार पडणार आहे. या कार्यक्रमात पद्मश्री मुरलीधर पेटकर (चंदू चॅम्पियन), ओमप्रकाश शेटे (अध्यक्ष – आयुष्मान भारत योजना व मुख्यमंत्री सहायता निधी), कमलेश सुतार (संपादक, झी २४ तास), अपूर्वा वैद्य (आनंद फाउंडेशन), वैष्णवी कल्याणकर (अभिनेत्री), अविनाश नारकर, श्रीनिवास नार्वेकर, प्रशांत बबन यादव (वाशिष्ठी मिल्क ॲण्ड मिल्क प्रॉडक्ट्स प्रा. लि.), महेश निंबाळकर आणि संस्थेचे अध्यक्ष  दयानंद कुबल प्रमुख पाहुणे म्हणून उपस्थित राहणार आहेत.
   महोत्सवात पारंपरिक नृत्य, रॅम्प वॉक, कला सादरीकरणे आणि सामाजिक कार्यातील योगदानासाठी विविध विशेष पुरस्कारांचे वितरण होणार आहे.

कोकण रत्न पुरस्कार – अभिनय व कला क्षेत्रात कोकणचे नाव उज्ज्वल करणाऱ्या कलाकारांना
रील टू रियल पुरस्कार – सोशल मीडियावर प्रभावीपणे कार्य करणाऱ्या कंटेंट क्रिएटर्ससाठी
झिरो टू हिरो पुरस्कार – ग्रामीण भागातील प्रेरणादायी महिलांसाठी
युथ आयकॉन पुरस्कार – उदयोन्मुख युवा उद्योजकांसाठी
आदर्श गाव पुरस्कार – शिक्षण, स्वच्छता, महिला सक्षमीकरण आणि पर्यावरण संवर्धनात आदर्श ठरलेल्या गावांसाठी
समाज गौरव पुरस्कार – निःस्वार्थपणे समाजकार्यात योगदान देणाऱ्यांसाठी
यू इन्स्पायर पुरस्कार – आपल्या कार्यातून समाजाला प्रेरणा देणाऱ्या व्यक्तिमत्त्वांसाठी

      या महोत्सवाच्या माध्यमातून मराठी कला, संस्कृती, परंपरा आणि समाजसेवेतील योगदान अधोरेखित करण्याबरोबरच नव्या पिढीला प्रेरणा देण्याचा प्रयत्न संस्था करीत आहे.कार्यक्रमातील विविध सांस्कृतिक सादरीकरणे, संवाद सत्रे आणि सन्मान सोहळा हे सर्व उपस्थितांसाठी अविस्मरणीय अनुभव ठरणार आहेत. कोकणावर प्रेम करणाऱ्या प्रत्येकाने ‘कोकण कला महोत्सव २०२५’ मध्ये सहभागी होऊन या प्रेरणादायी सोहळ्याचा आनंद घ्यावा, असे आवाहन संस्थाध्यक्ष दयानंद कुबल यांनी केले आहे.