सिंधुदुर्गात राजकीय दहशतवाद फोफावत असताना आमदार दीपक केसरकर धृतराष्ट्राच्या भूमिकेत.....मनसे उपजिल्हाध्यक्ष कुणाल किनळेकर यांचा आरोप

सिंधुदुर्ग

      सिंधुदुर्ग जिल्ह्यात राजकीय दहशतवाद पुन्हा फोफावत असताना त्याचा बाऊ करण्यात पटाईत आमदार दीपक केसरकर मात्र धृतराष्ट्राच्या भूमिकेत असून जिल्हा शल्य चिकित्सक तथा इतर डॉक्टर यांच्या राजीनाम्यासाठी केसरकर यांच्या पक्षाचे आमदार व कार्यकर्तेच जबाबदार असल्याचा आरोप मनसे उपजिल्हाध्यक्ष कुणाल किनळेकर यांनी केला आहे, सिंधुदुर्ग जिल्ह्यात आधीच डॉक्टरांची प्रकर्षाने कमतरता भासत असताना जिल्हा शल्य चिकित्सक व काही डॉक्टरांनी राजीनामा देण्याचे कारण राजकीय दहशतवाद असल्याचे बोलले जात असून कुडाळ येथील आरोग्य विभागाच्या जागेतील अनधिकृत बांधकाम पाडण्याच्या कारणास्तव जिल्हा शल्य चिकित्सक व सोबत असणाऱ्या डॉक्टरांना दमदाटी तसेच शिवीगाळ यामुळेच त्यांनी राजीनामा दिला असावा, नियमानुसार शासकीय जागेतील अनधिकृत बांधकाम पाडणे हे योग्यच आहे परंतु राजकीय द्वेषाने अधिकाऱ्यांना शिवीगाळ व दमदाटी करणे कितपत योग्य आहे, डॉक्टर यांच्या राजीनाम्यासाठी आमदार दीपक केसरकर यांच्या पक्षाचे आमदार, पदाधिकारी व कार्यकर्तेच जबाबदार असतील तर मग याला दीपक केसरकर यांच्या भाषेत राजकीय दहशतवादच म्हणावा लागेल, असं असेल तर राजकीय दहशतवादावर आप स्वार्थासाठी आवाज उठवणारे आमदार दीपक केसरकर यावेळी धृतराष्ट्राच्या भूमिकेतून बाहेर येणार का असा सवाल मनसे उपजिल्हाध्यक्ष कुणाल किनळेकर यांनी केला आहे.