पुण्यश्लोक अहिल्यादेवी होळकर पुरस्कारासाठी १५ ऑगस्ट पर्यंत अर्ज सादर करा.

सिंधुदुर्ग.

    महिला व बाल विकास विभागाकडून महिला व बाल विकास क्षेत्रामध्ये उल्लेखनीय कार्य करणाऱ्या समाजसेविकांना व संस्थाना दरवर्षी, पुण्यश्लोक अहिल्यादेवी होळकर पुरस्काराने गौरविण्यात येते. सन २०२०-२१,२०२१-२२,२०२२-२३ व सन २०२३-२४ या कालावधीच्या पुरस्कारासाठी इच्छुक व्यक्ती, संस्थेकडून दि.15 ऑगस्ट पर्यंत अर्ज सादर करण्याचे, आवाहन जिल्हा महिला व बाल विकास अधिकारी सोमनाथ रसाळ यांनी केले आहे.
  चार वषाचे प्रस्ताव मागविण्यात आले असून इच्छुक व्यक्तीला/ संस्थेला एका वेळी कोणत्याही एका वर्षासाठी प्रस्ताव करता येईल, पुरस्काराचे स्वरूप व अर्हता पुढीलप्रमाणे आहेत.
   राज्यस्तरीय पुरस्कार:-  रु.१,००,००१/- (अक्षरी रु.एक लाख एक मात्र) रोख स्मृती चिन्ह, सन्मानपत्र, शाल व श्रीफळ सदर पुरस्काराकरिता महिला व बाल विकास क्षेत्रामध्ये विमान 25 वर्षाचा सामाजिक कार्याचा अनुभव असावा. ज्या महिलांना जिल्हास्तरीय पुण्यश्लोक अहिल्यादेवी पुरस्कार, दलितमित्र पुरस्कार,अथवा सावित्रीबाई फुले पुरस्कार प्राप्त झालेला आहे. अशा महिलांना पुरस्कार मिळाल्याचे 5 वर्षापर्यंत राज्यस्तरीय पुरस्कारासाठी पात्र राहणार नाहीत.
    विभागीय पुरस्कार:- रु.२५,००१/- (अक्षरी रु पंचवीस हजार एक मात्र) रोख, स्मृती चिन्ह, सन्मानपत्र शाल व श्रीफळ महिला व बाल विकास क्षेत्रामध्ये किमान 7 वर्षे कार्य असावे. नोंदणीकृत संस्थेस दलित मित्र पुरस्कार प्राप्त नसावा. संस्था राजकारणापासून अलिप्त असावी. तसेच संस्थेचे कार्य व सेवा हि पक्षातील व राजकारणापासून अलिप्त असावी.
    जिल्हास्तरीय पुरस्कार :- रु.१०,००१/- (अक्षरी रु. दहा हजार एक मात्र.) रोख, स्मृती चिन्ह, सन्मान पत्र, शाल व श्रीफळ महिला व बाल विकास क्षेत्रामध्ये किमान 10 वर्षे सामाजिक कार्य असावे, ज्या महिलांना दलित मित्र पुरस्कार किंवा सावित्रीबाई फुले पुरस्कार मिळालेला आहे, त्या महिलांना जिल्हास्तरीय पुरस्कार अनुज्ञेय राहणार नाही. वरीलप्रमाणे अर्हता असणाऱ्या इच्छुक व्यक्ती/संस्थानी अर्हतेशी संबंधित आवश्यक कागदपत्रे तसेच पुढीलप्रमाणे कागदपत्रे सादर करणे आवश्यक आहे.

   राज्यस्तरीय व जिल्हास्तरीय पुरस्कारासाठी -

   चारित्र्य चांगले असले बाबत, कोणताही फौजदारी तसेच सार्वजनिक संपत्तीचा अपहार केल्याबाबतचा गुन्हा दाखल नसल्याचे जिल्हा पोलीस अधीक्षक यांचे प्रमाणपत्र. प्रस्ताव धारकाने सामाजिक आणि महिला व बालविकास विषयक केलेल्या कार्याचा तपशील.केलेल्या कार्याची वृत्तपत्र कात्रणे, फोटो इत्यादी. सद्यस्थितीत कोणत्या पदावर कार्यरत आहे.यापूर्वी कोणते पुरस्कार मिळालेले आहेत त्याचा तपशील. संपूर्ण नाव, वय, शैक्षणिक अर्हतता, पासपोर्ट आकाराचे 3 फोटो.

  विभागीय पुरस्कारासाठी - 

  संस्थेची माहिती व कार्याचा अहवाल. संस्थेचे पदाधिकारी यांचे चारित्र्य चांगले व कोणताही फौजदारी तसेच सार्वजनिक संपत्तीचा अपहार केला नसलेबाबतची व संस्था राजकारणापासून अलिप्त असल्याचे जिल्हा पोलीस अधीक्षक याचे प्रमाणपत्र.केलेल्या कार्याची वृत्तपत्र कात्रणे, फोटो इत्यादी.संस्थेस यापूर्वी कोणता पुरस्कार मिळालेला असल्यास त्याचा तपशील. संस्था नोंदणी प्रमाणपत्र व घटनेची प्रत.
   पुरस्काराकरिता इच्छुक व्यक्ती व संस्थांनी अधिक माहितीसाठी या कार्यालयाशी संपर्क साधावा व आवश्यक त्या सर्व कागदपत्रासह आपला परिपूर्ण प्रस्ताव 3 प्रती मध्ये दि. 15 ऑगस्ट 2023 पर्यंत जिल्हा महिला व बाल विकास अधिकारी कार्यालय प्रशासकीय इमारत, तळ मजला, ए ब्लॉक कक्ष क्र. 106. ओरोस सिंधुदुर्ग नगरी ता. कुडाळ जि. सिंधुदुर्ग येथे सादर करावेत.