सिंधुदुर्गातील पंचायत समिती सभापती व जिल्हा परिषद अध्यक्ष निवड 'या' तारखेला

सिंधुदुर्गनगरी

     सिंधुदुर्ग जिल्ह्यातील जिल्हा परिषद आणि पंचायत समितीच्या निवडणुकांचे निकाल लागल्यानंतर सर्वांना प्रतीक्षा होती ती म्हणजे अध्यक्ष आणि सभापती पदावर कोणाची वर्णी लागणार याची. ही प्रतीक्षा आता संपली असून जिल्हाधिकारी तृप्ती धोडमिसे यांनी या निवडीचा अधिकृत कार्यक्रम जाहीर केला आहे. या घोषणेमुळे जिल्ह्यातील राजकीय हालचालींना प्रचंड वेग आला असून सत्तास्थापनेसाठी विविध पक्षांनी आता मोर्चेबांधणी सुरू केली आहे.​नियोजित कार्यक्रमानुसार, जिल्ह्यातील आठही पंचायत समित्यांच्या सभापती आणि उपसभापती पदासाठीची निवडणूक येत्या ९ मार्च रोजी दुपारी ३ वाजता पार पडणार आहे. या दिवशी आठही तालुक्यांचे कारभारी निश्चित होतील. त्यानंतर एका आठवड्याने, म्हणजेच १६ मार्च रोजी दुपारी ३ वाजता जिल्हा परिषदेच्या अध्यक्ष आणि उपाध्यक्ष पदाची निवड प्रक्रिया पार पडेल. जिल्हाधिकाऱ्यांनी जाहीर केलेल्या या वेळापत्रकामुळे प्रशासकीय यंत्रणाही सज्ज झाली असून संबंधित निवडणूक निर्णय अधिकाऱ्यांना त्याबाबतच्या सूचना देण्यात आल्या आहेत.​गेल्या ९ फेब्रुवारी रोजी या निवडणुकांचे निकाल जाहीर झाले होते. निकाल लागून बराच काळ लोटल्याने जिल्ह्याचा कारभार नेमका कधी सुरू होणार आणि नवीन पदाधिकारी कधी खुर्चीवर बसणार, याबाबत कार्यकर्त्यांमध्ये आणि नागरिकांमध्ये मोठी उत्सुकता होती. आता प्रत्यक्ष निवडीच्या तारखा समोर आल्याने राजकीय पक्षांमधील गट-तटाच्या राजकारणाला आणि फोडाफोडीच्या चर्चेला उधाण आले आहे. बहुमताचा आकडा गाठण्यासाठी आणि आपली सत्ता प्रस्थापित करण्यासाठी सर्वच प्रमुख पक्षांचे नेते आता सक्रिय झाले असून, येत्या काही दिवसांत जिल्ह्याच्या राजकारणात मोठ्या घडामोडी घडण्याची शक्यता आहे.