कणकवली तालुक्यातील ६४ ग्रामपंचायतींचे आरक्षण जाहीर

कणकवली

       कणकवली तालुक्यातील ६४ ग्रामपंचायतींच्या सन २०२५ ते २०३० या कालावधीसाठीची सरपंच पदासाठीची आरक्षण सोडत काढण्यात आली. रोटेशननुसार हे आरक्षण जाहीर झाल्यावर सरपंच पदासाठी इच्छूक असलेल्या अनेकांच्या अपेक्षांवर पाणी फिरले आहे. तालुक्यातील ६४ पैकी ३३ ग्रामपंचायती महिलांसाठी राखीव झाल्या आहेत. यात अनुसूचित जातीसाठी ५ ग्रामपंचायती राखीव असून त्यातील ३ महिलांसाठी, नागरीकांच्या मागास प्रवर्गासाठी १७ ग्रामपंचायती असून त्यातील ९ महिलांसाठी तर खुल्या प्रवर्गातील ४२ पैकी २१ ग्रामपंचायती महिलांसाठी राखीव झाल्या आहेत. निवडणूक निर्णय अधिकारी तथा तहसीलदार दीक्षांत देशपांडे, निवासी नायब तहसीलदार मंगेश यादव, संजय गांधी निराधार योजना नायब तहसीलदार गंगाराम कोकरे, संभाजी खाडये, सत्यवान माळवे, राणे, मंडळ अधिकारी नागावकर आदी यावेळी उपस्थित होते. सनियंत्रण अधिकारी तथा उपजिल्हाधिकारी (भूसंपादन) आरती देसाई यांनी सोडत सुरू असलेल्या ठिकाणी भेट दिली.

आरक्षण पुढील प्रमाणे 

अनुसूचित जातीसाठी ५ ग्रामपंचायती आरक्षित झाल्या आहेत. त्यापैकी अनुसुचित जाती महिलांसाठी नवीन कुर्ली, पिसेकामते, वाघेरी आणि अनुसुचित जाती प्रवर्गासाठी शिरवल व दारिस्ते ग्रामपंचायत आरक्षित झाली आहे. 

नागरिकांचा मागास प्रवर्गासाठी १७ ग्रामपंचायती आरक्षित झाल्या आहेत. यापैकी नागरिकांचा मागास प्रवर्ग महिलांसाठी ९ जागा आहेत. त्यामध्ये कलमठ, ओझरम, लोरे नंबर १, वागदे, खारेपाटण, हरकुळ बुद्रुक, तरंदळे, साकेडी, चिंचवली या ग्रामपंचायतींचा समावेश आहे आणि नागरिकांचा मागास प्रवर्गासाठी ८ ग्रामपंचायती आरक्षित झाल्या असून नडगीवे, ओटव, ओसरगाव, कासार्डे, वरवडे, फोंडाघाट, बोर्डवे, आयनल यांचा समावेश आहे. 

सर्वसाधारण प्रवर्गासाठी ४२ ग्रामपंचायती आरक्षित झाल्या आहेत. त्यात सर्वसाधारण महिलांसाठी २१ ग्रामपंचायतींचा समावेश आहे. त्यामध्ये असलदे, कळसुली, कसवण - तळवडे, कुरंगवणे -बेर्ले, कोंडये, कोळोशी, डामरे, तळेरे, तीवरे, नांदगाव, पियाळी, हरकुळ खुर्द, भरणी, नाटळ, जानवली, शिडवणे, नरडवे, आशिये, बेळणे खुर्द, घोणसरी, साळीस्ते या ग्रामपंचायतींचा समावेश आहे आणि सर्वसाधारण प्रवर्गासाठी राखीव झालेल्या ग्रामपंचायतीमध्ये करंजे, करूळ, कासरल, कुंभवडे, गांधीनगर, तोंडवली बावशी, दारोम, दिगवळे, नागवे, बिडवाडी, भिरवंडे, माईण, वायंगणी, वारगाव, शेर्पे, शिवडाव, सांगवे, सातरल, हळवल, हुंबरठ, सावडाव या ग्रामपंचायतींचा समावेश आहे.