वेंगुर्ला नगरपरिषदेचे माजी नगराध्यक्ष प्रसन्ना कुबल यांचे निधन.

वेंगुर्ला.

  वेंगुर्ला कुबलवाडा येथील रहिवासी वेंगुर्ला नगरपरिषदेचे माजी नगराध्यक्ष प्रसन्ना उर्फ पप्पू कुबल (५२) यांचे सोमवार दि.१६ रोजी सायंकाळी अल्पशा आजाराने दुःखद निधन झाले. कुबल यांच्या निधनामुळे शहरात सर्वत्र हळहळ व्यक्त होत आहे.
   शिवम फाउंडेशनच्या माध्यमातून त्यांनी अनेक सामाजिक उपक्रम शहरात राबवले होते. त्यांच्या कार्यकाळात झालेल्या पर्यटन महोत्सवाची आजही शहरात चर्चा होते. स्वच्छ भारत अभियानात वेंगुर्ला शहराचे नाव राष्ट्रीय पातळीवर झळकविले. वेंगुर्ला नगरपरिषद देशात अव्वल ठरली.यात त्यांचा मोलाचा वाटा होता. अवघ्या अडीच वर्षाच्या आपल्या नगराध्यक्ष पदाच्या कार्यकाळात त्यांनी तत्कालीन मुख्याधिकारी रामदास कोकरे यांच्या सोबत शहरात स्वच्छतेची चळवळ उभी केली होती. आणि याचीच प्रचिती म्हणून आज कोट्यवधींची बक्षिसे वेंगुर्ले नगरपरिषदेला मिळून नगरपरिषद देशात अव्वल ठरली. सन २००० पासून प्रसन्ना कुबल व त्यांच्या पत्नी स्नेहा कुबल यांनी राष्ट्रवादी काँग्रेसच्या माध्यमातून वेंगुर्ला शहरात झपाट्याने सामाजिक कार्य सुरू केले होते.
  त्यांच्या पश्चात पत्नी, दोन मुलगे असा परिवार आहे.भाजपच्या माजी महिला जिल्हा अध्यक्षा तथा माजी नगरसेविका स्नेहा कुबल यांचे पती होत, तर जिल्हा बँक माजी संचालक नितीन कुबल भाऊ व माजी नगराध्यक्ष नम्रता कुबल यांचे ते दीर होत.