वैभववाडीत ३४ ग्रामपंचायतींचे सरपंच पदाचे आरक्षण जाहीर

वैभववाडी

    वैभववाडी तालुक्यातील ३४ ग्रामपंचायतींच्या आगामी सार्वत्रिक निवडणुकीतील सरपंच पदाचे आरक्षण जाहीर झाले आहे. यामध्ये १८ ग्रामपंचायतींवर महिलाराज असणार आहे. या आरक्षणामुळे अनेक गावांमधील इच्छुकांचे सरपंच बनण्याचे स्वप्न भंगले आहे. तर काहींना लॉटरी लागणार आहे. तालुक्यातील ग्रामपंचायतींच्या सरपंच पदाचे आरक्षण तहसीलदार सुर्यकांत पाटील यांनी जाहीर केले. तहसील कार्यालय सभागृहात चिठ्ठीद्वारे ही सोडत पद्धत पार पडली. यावेळी निवासी नायब तहसीलदार दिलीप पाटील, शिवाजी सुतार, सचिन निकम, एस. एस. बाबर, कांचन मांजरेकर, बी. टी. मांजरेकर आदी अधिकारी कर्मचारी उपस्थित होते. आरक्षण सोडतीच्या सुरवातीला अनुसूचित जाती प्रवर्गसाठी एक जागा, अनुसूचित जाती महिलासाठी दोन जागा (ग्रामपंचायती) आरक्षित करण्यात आल्या. त्यानंतर नागरिकांच्या मागास प्रवर्गासाठी ४ तर नागरिकांचा मागास प्रवर्ग महिला ५ जागांसाठी आरक्षण काढण्यात आले. तसेच उर्वरित २२ ग्रामपंचायती या सर्वसाधारण प्रवर्गासाठी आरक्षित झाल्या. यामध्ये सर्वसाधारण महिला ११, तर सर्वसाधारण (खुला) प्रवर्ग ११ ग्रामपंचायतीसाठी आरक्षण जाहीर करण्यात आले. या आरक्षण सोडती कु. क्रितिका पवार या इयत्ता दुसरीत शिकणाऱ्या मुलीच्या हस्ते सर्व चिठ्ठ्या उचलून करण्यात आली. यावेळी भाजपा तालुकाध्यक्ष सुधीर नकाशे, नासीर काझी, उबाठा तालुका प्रमुख मंगेश लोके, संजय सावंत, बंड्या मांजरेकर, रितेश सुतार, विलास नावळे, आकाराम नागप, पुंडलिक साळुंखे, हेमंत पाटील तसेच तालुक्यातील सरपंच व ग्रामस्थ उपस्थित होते.

• तालुक्यातील संपूर्ण ग्रामपंचायतीचे आरक्षण पुढीलप्रमाणे आहे.

अनुसूचित जाती महिला
भुईबावडा व सडुरे-शिराळे

अनुसूचित जाती प्रवर्ग 
जांभवडे

नागरिकांचा मागास प्रवर्ग महीला
कुसूर, तिरवडे तर्फ खारेपाटण, मांगवली, आखवणे-भोम, करूळ

नागरिकांचा मागास प्रवर्ग
एडगाव, सोनाळी, सांगुळवाडी, नाधवडे,

सर्वसाधारण

महीला
निमअरुळे, नापणे, वेंगसर, कुंभवडे, मौदे, लोरे नं. २, उपळे, कोकिसरे, कोळपे, तिथवली, आचिर्णे,

सर्वसाधारण(खुला)
हेत, नेर्ले, गडमठ, कुर्ली, उंबर्डे, नानीवडे, खांबाळे, अरुळे, नावळे, ऐनारी, तिरवडे तर्फ सौदळ. आरक्षण सोडत शांततेत पार पडली.