विद्यार्थ्यांच्या सर्वांगीण विकासासाठी मैदानी खेळ महत्त्वाचे - पोलीस निरीक्षक निसर्ग ओतारी......मदर तेरेसा स्कूल वेंगुर्ला येथे पावसाळी मैदानी खेळ संपन्न.

वेंगुर्ला

       
    मदर तेरेसा स्कूल वेंगुर्ला शाळेच्या मैदानावर वेंगुर्ला पोलीस निरीक्षक निसर्ग ओतारी यांच्या हस्ते पावसाळी खेळांचा शुभारंभ करण्यात आला. विद्यार्थ्यांच्या सर्वांगीण विकासासाठी मैदानी खेळ खूप महत्वाचे असून त्यामुळे संघ भावना व व्यक्तिमत्त्व विकास होत असल्याने विद्यार्थ्यांनी खेळात अधिक सहभाग घ्यावा असे मार्गदर्शन यावेळी ओतारी यांनी केले. त्यावेळी संस्थेचे मॅनेजर फादर फ्रान्सिस डिसोजा उपस्थित होते. या स्पर्धा १ व २ ऑगस्ट रोजी कलानगर मैदानावर घेण्यात आल्या. यामध्ये पहिली ते चौथी तसेच 14 वर्षाखालील विद्यार्थी व 17 वर्षाखालील विद्यार्थी या गटांमध्ये कबड्डी, खो-खो, लंगडी, रस्सीखेच असे सांघिक मैदानी खेळ तसेच गोळाफेक यासारखे खेळ घेण्यात आले. खेळाची सुरवात दहावी विद्यार्थी व शाळेचे मुख्याध्यापक, शिक्षक- पालक  संघ मिळून कबड्डी सामन्याने करण्यात आली. दुसऱ्या दिवशी उभादांडा सरपंच निलेश चमणकर यांनी उपस्थिती दर्शवली. खेळात प्रगती करून विद्यार्थ्यांनी आपल्या शाळेचे नाव उज्वल करावे असे आवाहन यावेळी करण्यात आले. यावेळी शाळेचे मुख्याध्यापक फादर फेलिक्स लोबो, शिक्षक, शिक्षकेतर कर्मचारी, पालक- शिक्षक समिती व सदस्य उपस्थित होते. तसेच खेळासाठी पंच म्हणून वसंत जाधव, दिनेश जाधव, हेमंत गावडे, प्रतीक्षा गावडे, तेजसराव दळवी, आरोसकर, ऑस्टिन फर्नांडिस, कार्मिस आल्मेडा, महेश कुर्ले, आग्नेल फर्नांडिस इत्यादी उपस्थित होते. सर्वांचे आभार शाळेचे सहाय्यक शिक्षक सतीश वारंग यांनी मानले.