सावंतवाडी मोती तलावातील मगर जेरबंद

सावंतवाडी
 

         गेले पाच दिवस सावंतवाडीच्या मोती तलावात वावरत असलेल्या मगरीला अखेर जेरबंद करण्यात वनविभागाच्या रेस्क्यू टीमला यश आले आहे. सुमारे पाच फूट लांबीची ही मगर आज जलद कृती दलाच्या सापळ्यात अडकली. त्यामुळे गणेशोत्सवाच्या काळात विसर्जनस्थळी निर्माण झालेले संकट दूर झाल्याने सावंतवाडीकरांनी सुटकेचा निःश्वास टाकला आहे.मोती तलावात मगर असल्याची बातमी पसरल्यानंतर परिसरात भीतीचे वातावरण निर्माण झाले होते. त्यातच ही मगर संगीत कारंजाच्या परिसरात येऊन दर्शन देत असल्यामुळे गणेश विसर्जनाच्या वेळी मोठा धोका निर्माण झाला होता. त्यामुळे या मगरीला तात्काळ पकडण्याची मागणी नागरिकांकडून करण्यात येत होती. या मागणीनुसार, गेल्या पाच दिवसांपासून वनविभागाने या मगरीला पकडण्यासाठी सापळा रचला होता. मात्र, अनेक प्रयत्न करूनही त्यात यश येत नव्हते.आज लावलेल्या सापळ्यात ही मगर अडकल्याने उपवनसंरक्षक मिलीश शर्मा यांच्या मार्गदर्शनाखाली सुरू असलेल्या या मोहिमेला यश आले. ही मोहीम यशस्वी करण्यासाठी वनक्षेत्रपाल सुहास पाटील, वनपाल प्रमोद राणे, पथक प्रमुख बबन रेडकर, प्रथमेश गावडे, शुभम कळसुलकर, शुभम फाटक, पुंडलिक राऊळ, आनंद राणे, देवेंद्र परब, राकेश अमृसकर आदींनी महत्त्वपूर्ण भूमिका बजावली.यावेळी बोलताना वनक्षेत्रपाल सुहास पाटील यांनी सांगितले की, "गणेश विसर्जनाच्या काळात नागरिकांमध्ये भीतीचे वातावरण होते, त्यामुळे ही मगर पकडणे महत्त्वाचे होते. तिला पकडण्यात यश आले असून लवकरच तिला तिच्या नैसर्गिक अधिवासात सोडले जाईल." जलद कृती दलाचे प्रमुख बबन रेडकर यांनी सांगितले की, "पाणी जास्त असल्यामुळे ही मोहीम आमच्यासाठी एक मोठे आव्हान होते. पण ही आमची ३६४ वी रेस्क्यू मोहीम यशस्वी झाली आहे." मगरीला पकडल्यानंतर ती पाहण्यासाठी नागरिकांनी मोठी गर्दी केली होती. वैद्यकीय तपासणीनंतर तिला योग्य ठिकाणी सुरक्षितपणे सोडण्यात येईल.