स्पंदन फाऊंडेशन व सरस्वती कोचिंग क्लासेसच्या रक्तदान शिबिराला उत्स्फूर्त प्रतिसाद.

मुंबई

      ‘स्पंदन फाऊंडेशन, मुंबई’ आणि ‘सरस्वती कोचिंग क्लासेस, मुंबई’ यांच्या संयुक्त विद्यमाने कांदिवली (पश्चिम) येथील भारतरत्न डॉ. बाबासाहेब आंबेडकर महानगरपालिका (शताब्दी) रुग्णालयात आयोजित करण्यात आलेल्या ‘रक्तदान शिबिर २०२६’ ला नागरिक व तरुणांचा उत्स्फूर्त प्रतिसाद मिळाला. सामाजिक बांधिलकी जपत अनेक रक्तदात्यांनी स्वेच्छेने रक्तदान करून या उपक्रमात सहभाग नोंदविला.रक्ताची गरज असलेल्या रुग्णांना वेळेवर रक्त उपलब्ध व्हावे आणि समाजामध्ये रक्तदानाबाबत जनजागृती निर्माण व्हावी, या उद्देशाने या शिबिराचे आयोजन करण्यात आले होते. रक्तदान हे केवळ सामाजिक कर्तव्य नसून, गरजू व्यक्तीचे प्राण वाचविण्यासाठी दिलेले अमूल्य योगदान आहे, या भावनेतून नागरिकांनी मोठ्या संख्येने सहभाग घेतला.या प्रसंगी आयोजकांनी सर्व रक्तदात्यांचे मनःपूर्वक आभार मानले. “रक्तदानामुळे गरजू रुग्णांना जीवनदान मिळू शकते. नागरिकांनी दाखविलेला उत्स्फूर्त प्रतिसाद हा समाजातील सामाजिक बांधिलकी आणि मानवतेची भावना अधिक दृढ करणारा आहे,” अशी भावना आयोजकांनी व्यक्त केली.शिबिर यशस्वी करण्यासाठी भारतरत्न डॉ. बाबासाहेब आंबेडकर मनपा रुग्णालयाच्या रक्त संकलन विभागातील वैद्यकीय अधिकारी, डॉक्टर, परिचारिका व संपूर्ण कर्मचारीवर्गाने मोलाचे सहकार्य केले. रक्त संकलनाची प्रक्रिया अत्यंत शिस्तबद्ध, सुरक्षित आणि तत्परतेने पार पाडण्यात आली.या सामाजिक उपक्रमाच्या यशस्वितेसाठी सहकार्य करणाऱ्या रुग्णालय प्रशासनासह सर्व वैद्यकीय अधिकारी, कर्मचारी, स्वयंसेवक आणि रक्तदात्यांचे स्पंदन फाऊंडेशन व सरस्वती कोचिंग क्लासेस यांच्या वतीने विशेष आभार मानण्यात आले.‘रक्तदान करा, जीवन वाचवा’ हा संदेश देत अशा सामाजिक उपक्रमांचे आयोजन भविष्यातही सातत्याने करण्यात येणार असल्याचे आयोजकांनी सांगितले.