पीएफ खातेदारांसाठी मोठी खुशखबर! आता ९० टक्के रक्कम एका क्लिकवर

पीएफ खातेदारांसाठी मोठी खुशखबर! आता ९० टक्के रक्कम एका क्लिकवर

सिंधुदुर्ग



        कर्मचारी भविष्य निधी संघटनेने (EPFO) आपल्या नियमांमध्ये ऐतिहासिक आणि नोकरदारांसाठी अत्यंत दिलासादायक बदल केले आहेत. केंद्र सरकार आणि सेंट्रल बोर्ड ऑफ ट्रस्टीजच्या (CBT) या निर्णयांमुळे पीएफची रक्कम काढण्याची प्रक्रिया अधिक वेगवान, लवचिक आणि सोपी झाली आहे. आता नोकरी सोडणाऱ्या किंवा 55 वर्षांपूर्वी निवृत्त होणाऱ्या खातेदारांना आपल्या पीएफ शिल्लकेतील तब्बल 90 टक्के रक्कम एका क्लिकवर मिळवण्याचा मार्ग मोकळा झाला आहे. पूर्वी खात्यात किमान 25 टक्के शिल्लक ठेवणे बंधनकारक असल्याने केवळ 75 टक्के रक्कमच काढता येत होती; मात्र आता किमान शिल्लकेची अट 10 टक्क्यांपर्यंत कमी केल्याने ठराविक अटींच्या अधीन राहून 90 टक्के रक्कम त्वरित काढता येईल. याशिवाय निवृत्त होणाऱ्या सदस्यांसाठी 'सिस्टमॅटिक विड्रॉल प्लॅन' (SWP) या सुविधेला मंजुरी देण्यात आली असून, यामुळे आपला संपूर्ण भविष्य निधी एकदम काढण्याऐवजी हप्त्यांमध्ये किंवा टप्प्याटप्प्याने काढून नियमित उत्पन्नाचा स्रोत निर्माण करता येणार आहे. पेमेंटच्या कालावधीत सदस्याचा दुर्दैवी मृत्यू झाल्यास नॉमिनीला उर्वरित रक्कम एकरकमी काढण्याचा किंवा SWP अंतर्गत नियमित हप्ते सुरू ठेवण्याचा पर्यायही उपलब्ध राहील. बेरोजगारीच्या काळात पीएफ काढण्यासाठी लागणारा प्रतीक्षा कालावधीही मोठा कमी करण्यात आला आहे. ईपीएफ योजनेतील बदलानुसार हा कालावधी 12 महिन्यांवरून थेट 2 महिन्यांवर आणण्यात आला आहे, ज्यामुळे आर्थिक अडचणीच्या वेळी सदस्यांना मोठा आधार मिळेल. तसेच आंशिक रक्कम काढण्याच्या (पार्शियल विड्रॉल) तरतुदीही अधिक सुकर झाल्या असून, स्वतःच्या किंवा कुटुंबातील व्यक्तींच्या वैद्यकीय उपचारांसाठी, शिक्षणासाठी, विवाहासाठी तसेच घर किंवा जमीन खरेदी, गृहकर्ज परतफेड अथवा घराची दुरुस्ती व रंगरंगोटी यांसारख्या महत्त्वाच्या गरजांसाठी नियमांच्या चौकटीत पैसे काढता येतील. कोणत्या कारणासाठी किती रक्कम आणि किती वेळा काढता येईल, याचे निकष संबंधित श्रेणी, गरज आणि मर्यादेनुसार लागू राहतील, ज्यामुळे पीएफ खातेदारांना आपल्या कष्टाच्या बचतीचा अधिक प्रभावी आणि वेळेवर वापर करणे शक्य होणार आहे.