मालवण उपविभागीय अभियंता अजित पाटील यांना राज्य शासनाचा पुरस्कार जाहीर

मालवण
 

     सिंधुदुर्ग जिल्ह्यातील मालवण उपविभागीय अभियंता श्री. अजित पाटील यांनी बांधकाम क्षेत्रात उल्लेखनीय काम केल्याबद्दल त्यांना महाराष्ट्र शासनातर्फे सन्मानचिन्ह व प्रशस्तीपत्रक देऊन यावर्षी सन्मानित करण्यात आले. सार्वजनिक बांधकाम विभागातील उल्लेखनीय कामगिरी बजावणाऱ्या तांत्रिक व अतांत्रिक संवर्गातील अधिकारी व कर्मचाऱ्यांना सन २०२४-२०२५ या कालावधीसाठी पुरस्कार प्रदान करण्यात आले त्यामध्ये श्री. पाटील यांना पुरस्कार प्राप्त झाला आहे.सार्वजनिक बांधकाम विभागामार्फत रस्ते, पूल, विविध विभागांच्या इमारती व इतर सार्वजनिक बांधकामे करण्यात येतात. इमारती/पुलांची संकल्पना तयार करुन व इतर माध्यमांचा म्हणजे संगणकाचाही उपयोग करुन संकल्पनाचित्रे बनवताना तसेच सार्वजनिक इमारतींची विद्युतीकरणाची कामे करताना व प्रकल्प राबविताना जे तांत्रिक कौशल्य पणाला लागते आणि ज्यामुळे अशा अभियंत्यांची सेवा समाजाला भविष्यात फायद्याची ठरते, अशा अभियंत्यांचे प्रशासकीय तसेच तांत्रिक कौशल्य लक्षात घेऊन त्यांचा वैयक्तिक पुरस्कार देऊन गौरव करण्यात येते.भारतरत्न सर विश्वेश्वरय्या यांचा १५ सप्टेंबर हा जन्मदिवस दरवर्षी "अभियंता दिन" म्हणून साजरा करण्यात येतो. त्यानिमित्ताने उल्लेखनीय कामगिरी केलेल्या अभियंत्यांना सन्मानचिन्ह व प्रशस्तीपत्र प्रदान करण्यात येते.यामध्ये उपविभागीय अभियंता श्री.अजित पाटील यांना हा सन्मान प्राप्त झाला आहे.