स्वयंचलित हवामान केंद्राची जि. प. सदस्य सुजाता पडवळ यांच्याकडून पाहणी.....शेतकऱ्यांच्या समस्या जाणून घेतल्या

स्वयंचलित हवामान केंद्राची जि. प. सदस्य सुजाता पडवळ यांच्याकडून पाहणी.....शेतकऱ्यांच्या समस्या जाणून घेतल्या

मातोंड

 

      मातोंड येथे स्कायमेट कंपनीच्या अधिकाऱ्यांसमवेत महसूल मंडळातील पदाधिकारी व स्थानिक प्रतिनिधींच्या उपस्थितीत स्वयंचलित हवामान केंद्राची पाहणी व तपासणी करण्यात आली. यावेळी जिल्हा परिषद सदस्य सौ. सुजाता पडवळ यांनी उपस्थित राहून हवामान केंद्राच्या कार्यप्रणालीची माहिती घेतली तसेच शेतकऱ्यांना हवामानविषयक माहिती अधिक अचूक व वेळेवर उपलब्ध होण्याच्या दृष्टीने आढावा घेतला. शेती मोठ्या प्रमाणावर हवामानावर अवलंबून असल्याने तापमान, पर्जन्यमान, वाऱ्याचा वेग व हवामानातील बदल यांची अचूक माहिती शेतकऱ्यांना मिळणे अत्यंत महत्त्वाचे आहे. विशेषतः आंबा उत्पादक शेतकऱ्यांना मोहोर, फळधारणा, फळगळ व फवारणीचे नियोजन करताना हवामानाचा अंदाज उपयुक्त ठरतो. या पार्श्वभूमीवर स्वयंचलित हवामान केंद्राची कार्यक्षमता, उपलब्ध माहिती आणि शेतकऱ्यांना होणारा उपयोग याबाबत पाहणीदरम्यान चर्चा करण्यात आली. शेतकऱ्यांना आधुनिक तंत्रज्ञानाच्या माध्यमातून शेती नियोजनासाठी आवश्यक माहिती मिळावी, हवामानातील बदलांमुळे होणारे संभाव्य नुकसान कमी व्हावे आणि कृषी क्षेत्रात तंत्रज्ञानाचा प्रभावी वापर वाढावा, यासाठी सौ. सुजाता पडवळ यांनी या उपक्रमाच्या अनुषंगाने पाहणी केली. यावेळी मातोंडच्या उपसरपंच सौ. वैभवी परब, ग्रामपंचायत सदस्य श्री. राहुल प्रभू, उपकृषी अधिकारी श्री. शंकर नाईक, आंबा उत्पादक शेतकरी श्री. जगदिश परब, सातेरी महा-ई-सेवा केंद्र मातोंडचे श्री. प्रशांत परब, आंबा उत्पादक शेतकरी श्री. गायेश परब, कृषिसेवक श्री. सोनटक्के, वेंगुर्ला तालुका विमा प्रतिनिधी श्री. नयन सावंत आणि छत्रपती शिवाजी महाराज सिंधुदुर्ग जिल्हा शेतकरी संघटनेचे अध्यक्ष श्री. श्याम सुंदर राय उपस्थित होते. शेतकऱ्यांच्या हिताच्या दृष्टीने हवामानविषयक सुविधा सक्षम करणे, कृषीविषयक माहिती शेतकऱ्यांपर्यंत पोहोचवणे आणि शेतीच्या समस्या जाणून घेऊन त्यावर उपाययोजनांसाठी पाठपुरावा करणे, यासाठी अशा पाहणी व संवाद उपक्रमांना महत्त्व असल्याचे यावेळी दिसून आले.