‘महात्मा बसवेश्वर सामाजिक समता शिवा’ पुरस्कारासाठी अर्ज करण्याचे आवाहन.

सिंधुदुर्ग.

    इतर मागास बहुजन कल्याण विभागांतर्गत "महात्मा बसवेश्वर" यांच्या जयंती निमित्त एक व्यक्ती एक संस्था यांना "महात्मा बसवेश्वर सामाजिक समता -शिवा पुरस्कार" देण्यात येणार आहे. तरी संस्था व व्यक्तींनी पुरस्काराचे अर्ज इतर मागास बहुजन कल्याण कार्यालय येथे दि. 22 मार्च पुर्वी पाठवावेत असे आवाहन  इतर मागास बहुजन कल्याणचे सहायक संचालक संतोष चिकणे यांनी केले आहे.
   राज्यातील  वीरशैव- लिंगायत समाजाच्या सामाजिक, शैक्षणिक आर्थिक विकास होण्यासाठी कलात्मक, समाजप्रबोधन व साहित्यिक क्षेत्रात कार्य करणाऱ्या कलावंत, साहित्यिक समाज प्रबोधनकार व समाज सेवक आणि यासाठी कार्य करणाऱ्या संस्थांना "महात्मा बसवेश्वर सामाजिक समता शिवा पुरस्कार" देण्याचा निर्णय शासन निर्णयान्वये शासनाने घेतलेला आहे.
   या पुरस्कारासाठी वीरशैव - लिंगायत समाजाकरिता सामाजिक, शैक्षणिक, सांस्कृतिक, समाज संघटनात्मक, आध्यात्मिक प्रबोधन व आर्थिकदृष्ट्या कल्याणासाठी झटणारे नामवंत समाजसेवक, कलावंत, समाज संघटनात्मक कार्यकर्ते, आध्यात्मिक प्रबोधनकार व साहित्यिक तसेच सामाजिक संस्था असाव्यात. वीरशैव –लिंगायत समाजासाठी कार्य करणारे समाजकल्याण, कलावंत, समाज संघटनात्मक कार्यकर्ते, आध्यात्मिक प्रबोधनकार व साहित्यिक क्षेत्रात कमीत कमी दहा वर्षे कार्य केलेले असावे. पुरस्कारासाठी पुरुषांचे वय 50 वर्षे अथवा त्यापेक्षा जास्त असावे व स्त्रियांचे वय 40 वर्षे अथवा त्यापेक्षा जास्त असावे.
   तरी इच्छुक व्यक्ती आणि संस्थानी प्रस्ताव सादर करण्याकरीता डॉ. बाबासाहेब आंबेडकर सामाजिक न्याय भवन सिंधुदुर्गनगरी या कार्यालयाशी संपर्क साधावा.