राजर्षी शाहू महाराज शिष्यवृत्ती योजनेचा लाभ घेण्याचे आवाहन.

सिंधुदुर्ग.

    शैक्षणिक वर्ष 2024-25 करिता जिल्ह्यातील अनुसूचित जातीच्या विद्यार्थ्यांना देशातील शैक्षणिक संस्थामध्ये उच्च शिक्षण घेण्यासाठी राजर्षी शाहू महाराज शिष्यवृत्ती योजनेचा लाभ घेण्याचे आवाहन  समाज कल्याण चे सहाय्यक आयुक्त संतोष चिकणे यांनी केले आहे.
   देशातील नामांकित संस्थांमध्ये उच्च शिक्षण घेण्यासाठी AIIMS, IIM, IIIT, NIT, IISC, IISER व इतर कॉलेज या शैक्षणिक संस्थांसह भारत सरकारच्या मनुष्यबळ विकास मंत्रालय संकेतस्थळावरील मान्यता प्राप्त नामांकित संस्थांमध्ये उच्च शिक्षण घेण्यासाठी अनुसूचित जाती / नवबौद्ध घटकातील विद्यार्थ्यांसाठी देशातील शैक्षणिक संस्थामध्ये उच्च शिक्षण घेण्यासाठी राजर्षी शाहू महाराज गुणवत्ता शिष्यवृत्ती योजना राज्याच्या समाज कल्याण विभागाकडून राबविली जाते.
   राज्यातील 100 अनुसूचित जाती / नवबौद्ध घटकांतील विद्यार्थ्यांना या योजनेचा लाभ देण्यात येतो. राज्यातील सर्व विभागातील विद्यार्थ्यांना समान संधी देण्याच्या उद्देशाने विभागीय माध्यमिक व उच्च माध्यमिक शिक्षण मंडळनिहाय 100 विद्यार्थ्यांची निवड करण्यात येते. या योजनेसाठी पात्र ठरलेल्या विद्यार्थ्यांस संबंधित विद्यापीठ संस्थेने अभ्यासक्रमासाठी ठरवून दिलेले पुर्ण शिक्षण शुल्क, नोंदणी फी, जिमखाना, ग्रंथालय, संगणक इ. शुल्क संबंधित विद्यापीठः शैक्षणिक संस्थेमार्फत विद्यार्थ्यांच्या आधार सलंग्न बँक खात्यात जमा करण्यात येते. वसतीगृह व भोजन शुल्क याचा देखील संस्था आकारणीनुसार खर्च देण्यात येणार आहे. तसेच पुस्तकांसाठी 5 हजार रुपये व इतर शैक्षणिक खर्चासाठी 5 हजार असे रूपये 10 हजार दोन टप्प्यात देण्यात येणार आहेत.
   या योजनेविषयी अधिक माहिती, जाहिरात अर्ज व नियमावली शासनाच्या www.maharashtra.gov.in या संकेतस्थावर जलद दुवे ताज्या घडामोडी या शिर्षाखाली उपलब्ध आहे. या संकेतस्थळावरून विहित अर्जाचा नमूना डाऊनलोड करून तो परिपूर्ण भरून कागदपत्रासह दि.26 ऑगस्ट 2024 रोजी सायंकाळी 6.15 वाजेपर्यंत आयुक्त, समाज कल्याण आयुक्तालय, महाराष्ट्र राज्य, 3 चर्च पच, पुणे येथे सादर करावीत, पदवी, पदव्युत्तर पदवी, पदव्युत्तर पदविका, पूर्णवेळ अभ्यासक्रमासाठी या योजनेचा लाभ देय असणार आहे. राज्यातील रहिवासी असलेल्या विद्यार्थ्यांनाच या योजनेचा लाभ मिळणार आहे. या योजनेसाठी जास्तीत जास्त अनु. जाती / नवबौद्ध घटकांतील विद्यार्थ्यांनी अर्ज सादर करावेत, असे आवाहन समाज कल्याणचे सहाय्यक आयुक्त संतोष चिकणे यांनी केले आहे.