मुंबई इंडियन्सचं स्पर्धेतील आव्हान संपुष्टात; घरच्या मैदानावर मुंबईचा केकेआरकडून पराभव.
konkansamwad
May 4, 2024 12:25
140
0
मुंबई.
आयपीएल २०२४ स्पर्धेतील आव्हान टीकवून ठेवण्यासाठी अतिशय महत्वाचा असलेला सामना अखेर मुंबई इंडियन्सने गमावला आहे. आयपीएल २०२४ स्पर्धेतील ५१ वा सामना मुंबई इंडियन्स आणि कोलकाता नाईट रायडर्स या दोन्ही संघांमध्ये पार पडला. गुणतालिकेत तळाशी असलेल्या मुंबई इंडियन्सला हा सामना जिंकणं अतिशय महत्वाचं होतं. मात्र मुंबईला हा सामना २४ धावांनी गमवावा लागला आहे. यासह मुंबई इंडियन्सचं स्पर्धेतील आव्हान संपुष्टात आलं आहे.
मुंबई इंडियन्स संघाला हा सामना जिंकण्यासाठी १७० धावांची गरज होती. या धावांचा पाठलाग करताना मुंबई इंडियन्स संघाकडून इशान किशन आणि रोहित शर्माची जोडी डावाची सुरुवात करण्यासाठी मैदानावर आली होती. या दोघांनाही चांगली सुरुवात करुन देता आली नाही. अवघ्या १६ धावसंख्येवर मुंबई इंडियन्सला पहिला मोठा धक्का बसला. इशान किशन अवघ्या १३ धावा करत माघारी परतला. तर त्यानंतर रोहित शर्माने अवघ्या ११ धावा करत पॅव्हेलियनची वाट धरली. तिसऱ्या क्रमांकावर फलंदाजीला आलेला नमन धीर देखील अवघ्या ११ धावा करत माघारी परतला. मुंबई इंडियन्सकडून फलंदाजी करताना एकट्या सूर्यकुमार यादवने अर्धशतकी खेळी केली. त्याने ३५ चेंडूंचा सामना करत ६ चौकार आणि २ षटकारांच्या मदतीने ५६ धावा केल्या.
