सिंधुदुर्गात लवकरच धावणार एसटी महामंडळाच्या मिनी बस
konkansamwad
Mar 7, 2025 12:36
297
0
मुंबई
सिंधुदुर्गात लवकरच एसटी महामंडळाच्या मिनी बसेस दाखल होणार आहेत. जिल्ह्यातील काही बसस्थानकांची डागडुजी व सुशोभीकरण करण्यात येणार आहे. या संदर्भात पालकमंत्री नितेश राणे यांनी महाराष्ट्र राज्य मार्ग परिवहन महामंडळाचे व्यवस्थापकीय संचालक विवेक भिमणवार यांची विधानभवनातील आपल्या दालनात बैठक घेऊन चर्चा केली. या बैठकीत जिल्ह्यातील एसटी सेवांबाबत आणि कारभाराबाबत चर्चा करण्यात आली.पर्यटन जिल्हा असलेल्या सिंधुदुर्गात मिनी बस सेवा सुरू करणे तातडीची गरज असल्याचे पालकमंत्र्यांनी यावेळी सांगितले असता या मागणीला एसटी महामंडळाच्या संचालकांनी सकारात्मक प्रतिसाद देत लवकरच मिनी बस सेवा सुरू करू असे राणे यांना सांगितले. पालकमंत्र्यांनी यावेळी जिल्ह्यातील काही बसस्थानके दुरावस्थेत असल्याचे ही अधिकाऱ्यांच्या निदर्शनास आणून दिले. त्या बसस्थानकांची तात्काळ डागडुजी करून सुशोभीकरण करणे तसेच गावागावांचा संपर्क वाढविण्यासाठी बसेसच्या फेऱ्यात वाढ करणे, रिक्त असलेले विभाग नियंत्रक पद तात्काळ भरण्याच्या सूचना ही यावेळी अधिकाऱ्यांना देण्यात आल्या.
