कोकण मराठी साहित्य परिषदेचे वार्षिक पुरस्कार जाहीर

कुडाळ

      महाराष्ट्रात अग्रगण्य असणाऱ्या कोकण मराठी साहित्य परिषदेच्या वतीने देण्यात येणाऱ्या वाड्मयीन व वाड्मयेतर पुरस्कार जाहीर करण्यात आले आहेत. हे पुरस्कार नुकतेच कोकण मराठी साहित्य परिषदेमध्ये जाहीर केले गेले. दरवर्षी कोकण मराठी साहित्य परिषदेच्यावतीने वाङमयीन व वाङमयेतर पुरस्कारासाठी विहित कालावधीतील प्रस्ताव मागितले जातात. त्यानुसार आलेल्या प्रस्तावाची मान्यवर व जाणकार परिक्षकाकडून छाननी केली जाते. त्यानंतर कोकण मराठी साहित्य परिषदेच्यावतीने पुरस्कार जाहीर केले जातात. त्यानुसार हे पुरस्कार जाहीर केले आहेत.सन २०२३-२४ चे पुरस्कार पुढीलप्रमाणे आहेत.
      कादंबरी विभागात प्रथम क्रमांकाचा र. वा. दिघे स्मृती पुरस्कार उदय जोशी यांच्या अर्धकौरव तर द्वितीय क्रमांकाचा वि. वा. हडप स्मृती पुरस्कार बाळासाहेब लबडे लिखित चिंबोरे युद्ध कादंबरीसाठी, कथा विभागात प्रथम क्रमांकाचा वि. सी. गुर्जर स्मृती पुरस्कार शशिकांत काळे यांच्या कालयंत्र तर द्वितीय क्रमांकाचा विद्याधर भागवत स्मृती पुरस्कार वीणा रारावीकर यांच्या गुजगोष्टी गत शब्दांच्या कथासंग्रहाला, कविता विभागात प्रथम क्रमांकाचा आरती प्रभू स्मृती पुरस्कार गीतेश शिंदे यांच्या सीसीटीव्हीच्या गर्द छायेत, तर द्वितीय क्रमांकाचा वसंत सावंत स्मृती पुरस्कार मानसी चाफेकर यांच्या हळुवार मनाची आई या कवितासंग्रहाला, आत्मचरित्र विभागात प्रथम क्रमांकाचा धनंजय कीर स्मृति पुरस्कार अरुण घाडीगावकर यांच्या भक्ती पंथेची जावे या संग्रहास, चरित्र विभागात श्रीकांत शेट्ये स्मृती पुरस्कार डॉ. राजू शनवार यांच्या पोश्यांपार या चरित्रास, समीक्षा विभागात प्रभाकर पाध्ये स्मृती पुरस्कार रोहिदास पोटे यांच्या गझल गंधाक्षरी या ग्रंथास, नाटक विभागाचा भाई भगत पुरस्कार प्रकाश चांदे यांच्या तराने अपसाने या नाटकास, तर ललित गद्य विभागातील प्रथम क्रमांकाचा अनंत काणेकर स्मृती पुरस्कार वैशाली पंडित यांच्या मंत्रभुल या ललित ग्रंथास तर द्वितीय क्रमांकाचा सौ. लक्ष्मीबाई व माजी न्यायमूर्ती राजाभाऊ गवांदे पुरस्कार डॉ. अजित मगदूम यांच्या न घेतलेला रस्ता या साहित्यकृतीस, बालवाङमय विभागाचा प्र. श्री. नेरुरकर स्मृती पुरस्कार सदानंद पुंडपाळ यांच्या हिरवी राने, गाती गाणे या ग्रंथास, संकीर्ण विभागातील प्रथम क्रमांकाचा वि. कृ. नेरुरकर स्मृती पुरस्कार रिचर्ड नुनीस यांच्या वाडवळी शब्द कोष आणि व्युत्पत्ती शोध, तर द्वितीय क्रमांकाचा अरुण आठल्ये स्मृती पुरस्कार जे. डी. पराडकर यांच्या अक्षरयात्रा या ग्रंथास आणि वैचारिक विभागासाठीचा फादर स्टीफन सुवार्ता पुरस्कार ना. वा. रणशिंग यांच्या आदिवासी ते पांढरपेशी या ग्रंथास, नाटक - एकांकिका विभागाचा रमेश कीर पुरस्कार डॉ. सुभाष कटकदौंड यांच्या नव्याने जगायचय मला या ग्रंथास मिळाला आहे. तर कोकण मराठी साहित्य परिषदेचे संपादन, कथासंग्रह, कादंबरी विभागातील विशेष पुरस्कार अनुक्रमे बीज अंकुरेसाठी सुरेश ठाकूर यांना, पटावरच्या सोंगट्या साठी विलास गावडे यांना व वाळूचे किल्लेसाठी अविनाश कोल्हे यांना जाहीर झाले आहेत.यासोबतच वाङमयेतर पुरस्कारांमध्ये कविता राजधानी पुरस्कार मालवणचे कोकणी कवी रुजारिओ पिंटो, कोकण साहित्यभूषण डहाणूचे प्रवीण नारायण दवणे, पालघर व ठाणे जिल्ह्यात साहित्य, पर्यावरण, शिक्षण, आदी क्षेत्रात भरीव कामगिरी करणाऱ्या व्यक्तींना दिला जाणारा कै. पद्मश्री भाऊसाहेब वर्तक प्रतिष्ठान पुरस्कार माजी शिक्षणाधिकारी, साहित्यिक डॉ. जिवबा केळुस्कर यांना तर संपूर्ण कोकणात साहित्य, पर्यावरण, शिक्षण क्षेत्रात योगदान देणाऱ्या व्यक्तीला देण्यात येणारा श्री. बा. कारखानीस पुरस्कार ज्येष्ठ साहित्यिक, लेखक, डॉ. तानाजीराव चोरगे यांना, गुरुवर्य अ. आ. देसाई कोमसाप कार्यकर्ता पुरस्कार मुंबईच्या बोरिवली शाखेचे जगदीश भोवड यांना, राजा राजवाडे स्मृती वाङमयीन पुरस्कार ठाण्याच्या नितल वढावकर, ग्रामीण भागातील स्त्री लेखिकेसाठीचा सौ. नमिता कीर लक्षवेधी पुरस्कार रत्नागिरीच्या उज्वला प्रभाकर बापट यांना, वामनराव दाते स्मृती उत्कृष्ट कोमसाप शाखा पुरस्कार पालघर जिल्ह्यातील पालघर शाखेस, तर महाविद्यालयीन विद्यार्थिनींना दिला जाणारा सुलोचना मुरारी नार्वेकर स्मृती पुरस्कार लांजाच्या तनुजा संतोष प्रभूदेसाई यांना, उमेदीच्या गुणवंत कवीस देण्यात येणारा कवी उमाकांत कीर स्मृति काव्य पुरस्कार मालगुंडचे अरुण तुकाराम मोर्ये यांना आणि युवा विभागात काम करणाऱ्या कार्यकर्त्याला देण्यात येणारा कोमसाप युवा कार्यकर्ता पुरस्कार ठाण्याच्या दीपा ठाणेकर यांना जाहीर झाला आहे.कोकण मराठी साहित्य परिषदेच्या वतीने देण्यात येणाऱ्या वाङमयीन पुरस्कार विजेत्यांना रोख रक्कम, सन्मानचिन्ह, सन्मानपत्र मान्यवरांच्या उपस्थितीत प्रदान करण्यात येणार आहे.सन २०२३ - २४ मधील पुरस्कारप्राप्त सर्वांचे कोकण मराठी साहित्य परिषदेचे संस्थापक अध्यक्ष पद्मश्री मधु मंगेश कर्णिक, कोकण मराठी साहित्य परिषदेच्या केंद्रीय अध्यक्षा नमिता कीर, कोकण मराठी साहित्य परिषदेचे केंद्रीय कार्याध्यक्ष प्रा. डॉ. प्रदीप ढवळ, केंद्रीय कार्यवाह माधव अंकलगे यांच्यासह कोकण मराठी साहित्य परिषद परिवारातर्फे अभिनंदन करण्यात आले.