तुळस येथे वेताळ प्रतिष्ठानच्या रक्तदान शिबिरात ८७ जणांचे रक्तदान.....विशाल परब यांच्या वाढदिवसानिमित्त सामाजिक उपक्रम; मान्यवरांनी अधोरेखित केले रक्तदानाचे महत्त्व

वेंगुर्ला

    वाढदिवसाचा आनंद समाजसेवेतून साजरा करण्याचा आदर्श पुढे ठेवत युवा नेते तथा सामाजिक कार्यकर्ते विशाल प्रभाकर परब यांच्या वाढदिवसानिमित्त वेताळ प्रतिष्ठान सिंधुदुर्ग–तुळस यांच्या वतीने रक्तपेढी सिंधुदुर्ग यांच्या सहकार्याने तुळस येथील उत्सव मंगल कार्यालयात रक्तदान शिबिराचे आयोजन करण्यात आले. या शिबिराला उत्स्फूर्त प्रतिसाद मिळाला. एकूण ८७ रक्तदात्यांनी रक्तदान करून सामाजिक बांधिलकी जपली. या उपक्रमासाठी सहयोगी संस्था म्हणून बाल गोवर्धन कला क्रीडा मंडळ, राऊळवाडी, तुळस यांचे सहकार्य लाभले. शिबिराचे उद्घाटन वेंगुर्ले पंचायत समितीचे सभापती शंकर घारे यांच्या हस्ते दीपप्रज्वलन करून, तर विशाल परब यांच्या हस्ते गणेशपूजन करून करण्यात आले. जिल्ह्यातील रक्ताची गरज लक्षात घेऊन गरजू रुग्णांना वेळेवर रक्त उपलब्ध व्हावे, या उद्देशाने या शिबिराचे आयोजन करण्यात आले. रक्तदानामुळे एखाद्या गरजू रुग्णाला जीवनदान मिळू शकते, हा मानवतेचा संदेश या उपक्रमातून देण्यात आला. विशाल परब म्हणाले, “वाढदिवसाच्या निमित्ताने वेताळ प्रतिष्ठान सिंधुदुर्ग–तुळसच्या माध्यमातून समाजासाठी काहीतरी करता आले, याचा मला विशेष आनंद आहे. वेताळ प्रतिष्ठान गेली अनेक वर्षे रक्तदानासारख्या सामाजिक उपक्रमांतून माणुसकीचे नाते जपत आहे. रक्तदानामुळे एखाद्या गरजू रुग्णाला जीवनदान मिळू शकते. त्यामुळे तरुणांनी प्रतिष्ठानच्या या सेवाभावी चळवळीत सहभागी व्हावे आणि सामाजिक कार्यात आपलाही वाटा उचलावा.” सावंतवाडीचे उपनगराध्यक्ष अॅड. निरवडेकर म्हणाले, “रुग्णाला वेळेवर रक्त मिळणे अनेकदा जीवन-मरणाचा प्रश्न ठरते. अशा वेळी रक्तदात्यांनी केलेली मदत मोलाची असते. रक्तदानाबाबत समाजात अधिक जागरूकता निर्माण झाली, तर गरजू रुग्णांना मोठा आधार मिळू शकतो.” तुळसच्या सरपंच रश्मी परब म्हणाल्या, “वेताळ प्रतिष्ठान रक्तदान शिबिरांच्या माध्यमातून सातत्याने सामाजिक उपक्रम राबवत आहे, ही समाधानाची बाब आहे. अशा उपक्रमांना नागरिकांची साथ मिळाली, तर अनेक गरजू रुग्णांना मदत होऊ शकते. नागरिकांनीही रक्तदानासाठी पुढाकार घ्यावा." जिल्हा परिषद सदस्य सुजाता पडवळ म्हणाल्या, “रक्तदान हे केवळ सामाजिक कार्य नसून माणुसकी जपण्याचे महत्त्वपूर्ण माध्यम आहे. वेताळ प्रतिष्ठान सिंधुदुर्ग–तुळसच्या माध्यमातून सातत्याने राबविण्यात येणारे रक्तदान शिबिरासारखे उपक्रम कौतुकास्पद आहेत. विशाल परब यांच्या वाढदिवसानिमित्त आयोजित या शिबिरामुळे गरजू रुग्णांना मदत होण्यास हातभार लागणार आहे. समाजातील प्रत्येकाने रक्तदानाचे महत्त्व ओळखून अशा सेवाभावी उपक्रमांमध्ये सहभागी व्हावे.” पंचायत समितीचे सभापती शंकर घारे म्हणाले, “रक्ताची गरज कधी आणि कोणाला भासेल, हे सांगता येत नाही. त्यामुळे रक्तसाठा पुरेसा राहण्यासाठी नियमित रक्तदान होणे गरजेचे आहे. वेताळ प्रतिष्ठानचा हा उपक्रम समाजोपयोगी असून, अशा शिबिरांमधून रक्तदानाबाबत जनजागृती होण्यास मदत होते.” वेताळ प्रतिष्ठान सिंधुदुर्ग–तुळस गेल्या अनेक वर्षांपासून रक्तदान चळवळीत सक्रिय असून, विविध ठिकाणी रक्तदान शिबिरांचे आयोजन करत आहे. रक्ताची गरज असलेल्या रुग्णांना वेळेवर मदत मिळावी आणि अधिकाधिक नागरिक रक्तदानासाठी प्रेरित व्हावेत, यासाठी प्रतिष्ठान सातत्याने प्रयत्नशील आहे. विशाल परब यांच्या वाढदिवसानिमित्त आयोजित या शिबिरातून समाजसेवा आणि सामाजिक बांधिलकी जपण्याचा संदेश देण्यात आला. या वेळी भाजपचे जिल्हा उपाध्यक्ष प्रसन्ना देसाई, सावंतवाडीचे उपनगराध्यक्ष अॅड. निरवडेकर, पंचायत समितीचे सभापती शंकर घारे, तुळसच्या सरपंच रश्मी परब, जिल्हा परिषद सदस्य सुजाता पडवळ, उपसरपंच नारायण कुंभार, ग्रामपंचायत सदस्य जयवंत तुळसकर, सचिन नाईक, दादा ठुंबरे, यासिर मकानदार, जयंत मुळीक, गायत्री धोंड, श्रद्धा गोरे, तंटामुक्ती समितीचे अध्यक्ष नाना राऊळ, सुधीर चुडजी आदी मान्यवर उपस्थित होते. रक्तदान शिबिर यशस्वी करण्यासाठी वेताळ प्रतिष्ठान सिंधुदुर्ग–तुळसचे अध्यक्ष डॉ. सचिन परुळकर, सचिव विवेक तिरोडकर, रक्तमित्र संघटक महेश राऊळ, माधव तुळसकर, मंगेश सावंत, सद्गुरू सावंत, किरण राऊळ, सानिया वराडकर, वैष्णवी परूळकर, भूमी परूळकर, भार्गवी परूळकर, सुहास सावंत, ओम कुंभार, सागर सावंत, प्रदीप परुळकर, प्रज्वल परूळकर, राजू परूळकर, प्रतीक परूळकर, यशवंत राऊळ, रोहन राऊळ, सचिन राऊळ, श्रीधर राऊळ, डॉ. गोविंद धुरी, बंड्या राऊळ, गणेश सावंत, बंटी सावंत, दृष्टी राऊळ, प्रदीप सावंत, गणेश राऊळ, सचिन गावडे आदींनी मेहनत घेतली. ‘गरज रक्ताची... साथ मानवतेची!’ या भावनेतून आयोजित या शिबिरात ८७ जणांनी रक्तदान करून मानवतेच्या कार्यात योगदान दिले. सूत्रसंचालन डॉ. सचिन परुळकर यांनी केले, तर महेश राऊळ यांनी आभार मानले.