त्रिपुरारी पौर्णिमेला तेंडोलीत श्री देव रवळनाथ पंचायतनचा वार्षिक जत्रोत्सव
कुडाळ
तेंडोली गावचे आराध्य दैवत श्री देव रवळनाथ पंचायतन यांचा वार्षिक जत्रोत्सव यंदा २४ नोव्हेंबर रोजी त्रिपुरारी पौर्णिमेच्या पावन मुहूर्तावर मोठ्या उत्साहात आणि भक्तिभावाने पार पडणार आहे. या उत्सवानिमित्त दिवसभर विविध पारंपरिक व धार्मिक कार्यक्रमांची रेलचेल असणार असून पहाटेपासूनच भाविकांची दर्शनासाठी रीघ लागणार आहे. सकाळच्या सत्रात दर्शन व ओटी भरण्याबरोबरच नवस बोलणे आणि फेडणे, तसेच केळी व नारळ अर्पण करण्याचे विधी होतील. संध्याकाळी पाषाणांची आकर्षक सजावट करण्यात येईल आणि तरंगरुप देवतांना वस्त्रालंकार चढवून श्रीफळ ठेवत पारंपरिक गाऱ्हाणे घातले जाईल. रात्री ८ वाजता दीपोत्सवाचा भाग म्हणून टिपर (पणत्या) प्रज्वलित केल्या जातील, त्यानंतर रात्री ९ वाजता वाजतगाजत पालखी प्रदक्षिणेचा दिमाखदार सोहळा रंगेल. सांस्कृतिक आकर्षणाचा कळस म्हणून रात्री ११ वाजता प्रसिद्ध मामा मोचेमाडकर दशावतार मंडळाचे नाटक सादर होणार असून, दुसऱ्या दिवशी सकाळी पारंपरिक दहिकाल्याच्या कार्यक्रमाने या जत्रोत्सवाची सांगता होईल. या संपूर्ण सोहळ्याचा भाविकांनी मोठ्या संख्येने लाभ घ्यावा, असे आवाहन श्री देव रवळनाथ पंचायतन देवस्थान स्थानिक सल्लागार उपसमिती (तेंडोली) आणि समस्त ग्रामस्थांच्या वतीने करण्यात आले आहे.
konkansamwad 
