शहर विकासासाठी पक्षपात न करता न्याय देणार - नितेश राणे

कणकवली

        कणकवली नगरपंचायत, मालवण नगरपरिषदेमध्ये आमदार निलेश राणेंच्या नेतृत्वाखाली उमेदवारांनी विजय मिळवला आहे. त्याबद्दल निलेश राणेंचे आम्ही अभिनंदन करत आहोत. कणकवलीत आमचा पराभव झाला असला तरी आम्ही विकासासाठी पूर्ण सहकार्य करणार असल्याची ग्वाही पालकमंत्री नितेश राणे यांनी दिली. येथील ओम गणेश निवासस्थानी श्री. राणे यांनी पत्रकार परिषद घेतली. ते म्हणाले, सिंधुदुर्ग जिल्ह्यातील नगरपरिषद आणि नगरपंचायत निवडणुकीचे निकाल जाहीर झाले आहेत. भाजपला सावंतवाडी आणि वेंगुर्लेत यश मिळाले. सावंतवाडीत श्रद्धाराजे भोसले तर वेंगुर्लेत राजन गिरप यांनी नगराध्यक्षपद पटकावले. मात्र, मालवणमध्ये ममता वराडकर आणि कणकवलीत संदेश पारकर यांनी नगराध्यक्षपदासाठी विजय मिळवला आहे. या सर्वांचे अभिनंदन. आता निवडणुका संपल्या असून शहर विकासासाठी पक्षपात न करता शंभर टक्के न्याय देणार आहोत. ते म्हणाले, मालवण आणि कणकवलीची निवडणूक आमदार निलेश राणेंच्या नेतृत्वाखाली जिंकली आहे. यात कणकवलीकरांनी शहरविकास आघाडीच्या नेत्यांच्या आणि संदेश पारकर यांच्या भावनिक आवाहनाला साथ दिली आहे. भाजपचे कार्यकर्ते मालवण आणि कणकवलीत प्रामाणिकपणे लढले. लोकशाहीत लोकमताचा आदर करायचा असतो. कणकवली आणि मालवणमध्ये संघटनात्मक लढाईसाठी पावले उचलू. कणकवलीत शहर विकासासाठी आमदार राणेंच्या शब्दांवर विश्वास टाकून जनतेने निकाल दिला आहे, त्यासाठी मी सहकार्य करायला तयार आहे. ते म्हणाले, कणकवलीत "शहरविकास आघाडीने माझ्या विरोधात एकत्र येऊन आघाडी केली. सर्व पक्ष माझ्या विरोधात होते. मात्र, मी निवडणुकीत वातावरण खराब होऊ देणार नाही, असा शब्द दिला होता आणि तो पाळला आहे. दरम्यान मतदार विकले जातात असे आरोप चुकीचे असल्याचे सांगताना त्यांनी पैसे वाटपाच्या आरोपांना आव्हान दिले. "कुठे पैसे वाटताना दिसले? व्हिडिओ दाखवा," असे ते म्हणाले. कणकवलीत विकास झाला असतानाही पराभव झाला याचे विश्लेषण करू, असेही त्यांनी नमूद केले. मात्र, निलेश राणेंच्या एन्ट्रीमुळे शहरविकास आघाडीला ताकद मिळाली आणि विजय झाला. "माझा भाऊ म्हणून निलेश राणेंवर अभिमान वाटतो," असेही ते म्हणाले.