कळसुलकर प्राथमिक शाळेच्या मुलांनी साकारली अनोखी गुरुपौर्णिमा

कळसुलकर प्राथमिक शाळेच्या  मुलांनी साकारली अनोखी गुरुपौर्णिमा

 

सावंतवाडी

 

        आपल्या सर्वांच्या जीवनात गुरूला अनन्यसाधारण महत्त्व आहे. आई- वडील आपले पहिले गुरु, त्यानंतर शिक्षक आपले गुरु असतात. त्याचप्रमाणे निसर्ग हा आपला मार्गदर्शक तथा गुरु असतो. या संकल्पनेतून यावर्षी कळसुलकर प्राथमिक शाळेच्या  मुलांनी "निसर्ग माझा गुरु" या थीमवर गुरुपौर्णिमा हा सण उत्साहात साजरा केला.यावेळी वृक्ष संवर्धनाची प्रतिज्ञा घेत मुलांनी गुरुपौर्णिमा हा उत्सव साजरा केला.यावेळी माध्यमिक शाळेचे मुख्याध्यापक श्री. भुरे, प्राथमिक शाळेचे मुख्याध्यापक श्री. सावंत, पालक संघाच्या उमा बांदेकर तसेच अन्य पदाधिकारी, शिक्षक श्री. डी.जी.वरक, श्री. अमित कांबळे, श्रीम. ज्योत्स्ना गुंजाळ, श्रीम. प्राची बिले, श्रीम. वर्षा गावकर, श्रीम. संजना आडेलकर, श्रीम. स्मिता घाडीगावकर, विद्यार्थी तसेच पालक उपस्थित होते. यावेळी मुख्याध्यापकांनी वृक्षाचे महत्त्व मुलांना पटवून दिले. वृक्ष संवर्धन काळाची गरज आहे. प्रत्येक माणूस हा परिसरातून शिकत असतो. त्या अर्थाने परिसर आपला खरा गुरु असतो. आपण परिसराला ओळखले पाहिजे, समजून घेतले पाहिजे. परिसराची काळजी घेतली पाहिजे. वृक्ष लागवड केली पाहिजे आणि त्यांचे संवर्धन सुद्धा केले पाहिजे. याविषयीची माहिती त्यांनी  मुलांना दिली. मुलांनी वृक्षप्रती प्रेम व्यक्त करताना झाडे लावू, झाडे जगवू, झाडांचे संवर्धन करू अशी प्रतिज्ञा घेतली.