मालवण येथे उमेदवार अर्ज दाखल करण्याच्या चौथ्या दिवशी ठाकरे शिवसेनेचे जोरदार शक्तीप्रदर्शन
konkansamwad
Nov 14, 2025 10:47
340
0
मालवण
मालवण येथील पालिका निवडणुकीच्या उमेदवार अर्ज दाखल करण्याच्या चौथ्या दिवशी ठाकरे शिवसेनेने जोरदार शक्तीप्रदर्शन करून तीन उमेदवारी अर्ज दाखल करीत शुभारंभ केला. यावेळी ठाकरे शिवसेनेतर्फे प्रभाग २ अ मधून उमेश पुरुषोत्तम मांजरेकर आणि २ ब मधून अनिता पॉली गिरकर यांनी उमेदवारी अर्ज दाखल केला. तर प्रभाग ३ अ मधून ठाकरे शिवसेनेतर्फे उमेश अरविंद चव्हाण यांनी उमेदवारी अर्ज दाखल केला.
मालवण नगरपालिका निवडणुकीसाठी प्रभाग क्र. २- अ या सर्वसाधारण आरक्षण असलेल्या जागेवर ठाकरे शिवसेनेतर्फे ज्येष्ठ शिवसैनिक उमेश मांजरेकर यांना उमेदवारी देण्यात आली आहे. तर २- ब या जागेसाठी ठाकरे शिवसेनेकडून अनिता गिरकर यांना उमेदवारी देण्यात आली आहे. या दोन्हीही उमेदवारांनी नगरपालिकेत आपापले उमेदवारी अर्ज दाखल केले. यावेळी ठाकरे शिवसेनेकडून माजी आमदार वैभव नाईक यांच्यासह बहुसंख्य पदाधिकारी व कार्यकर्त्यांच्या उपस्थितीत जोरदार शक्तीप्रदर्शनही करण्यात आले. तर यानंतर प्रभाग क्र. ३ अ या सर्वसाधारण राखीव जागेसाठी ठाकरे शिवसेनेतर्फे उमेश अरविंद चव्हाण यांनी उमेदवारी अर्ज दाखल केला. यावेळी चव्हाण यांच्या सोबत बहुसंख्येने कार्यकर्ते उपस्थित होते.
