गोवा-मुंबई महामार्गावर दारू तस्करी पकडली!......राज्य उत्पादन शुल्क विभागाची कोट्यवधींची कारवाई

इन्सुली 

   राज्य उत्पादन शुल्क विभागाने सावंतवाडी तालुक्यातील इन्सुली तपासणी नाक्यावर गोवा-मुंबई राष्ट्रीय महामार्ग क्र. 66 वर मध्यरात्री मोठी कारवाई करत सुमारे १ कोटी ८ लाख ८० हजार रुपये किंमतीचा मुद्देमाल जप्त केला आहे.मिळालेल्या गुप्त माहितीनुसार, उत्पादन शुल्क पथकाने रात्री १ वाजताच्या सुमारास गोवा बनावटीची रॉयल ब्लू माल्ट व्हिस्कीच्या ७२ हजार बाटल्या (१५०० खोके) भरलेल्या कंटेनरला थांबवले. जप्त झालेल्या मद्याची किंमत सुमारे ९३ लाख ६० हजार रुपये, तर टाटा मोटर्स कंपनीचे बाराचाकी कंटेनर (क्र. GJ-10-Z-9984) अंदाजे १५ लाख रुपये, तसेच दोन अँड्रॉइड मोबाईल मिळून एकूण १ कोटी ८ लाख ८० हजार रुपयांचा मुद्देमाल हस्तगत करण्यात आला.

        या कारवाईत रामनिवास (वय २५, रा. बाडमेर, राजस्थान) व नूर आलम (वय २६, रा. प्रतापगढ, उत्तर प्रदेश) या दोघांना अटक करण्यात आली असून त्यांच्याविरुद्ध महाराष्ट्र दारुबंदी कायदा १९४९ अंतर्गत गुन्हा नोंदविण्यात आला आहे.

       ही महत्त्वपूर्ण कारवाई डॉ. राजेश देशमुख (आयुक्त, राज्य उत्पादन शुल्क, महाराष्ट्र राज्य मुंबई), पी. पी. सुर्वे (सहआयुक्त, अंमलबजावणी व दक्षता), विजय चिंचाळकर (विभागीय उपआयुक्त, कोल्हापूर) आणि वश्री. किर्ती शेडगे (अधीक्षक, सिंधुदुर्ग) यांच्या मार्गदर्शनाखाली करण्यात आली.कारवाईत धनंजय साळुंखे (दुय्यम निरीक्षक), विवेक कदम (दुय्यम निरीक्षक) तसेच जवान रणजीत शिंदे, दीपक वायदंडे, सतीश चौगुले, अभिषेक खत्री, सागर सुर्यवंशी यांनी सहभाग घेतला.या प्रकरणाचा पुढील तपास धनंजय साळुंखे, दुय्यम निरीक्षक हे करीत आहेत.